في بلاد تركب الفيل

في بلاد تركب الفيل
فيه اختراع جميل
إنك لو حسيت بالملل
أو بالفشل
أو إنك بايخ
زي الضيف التقيل
تقدر تسلم العهدة والمفتاح
وتريح وترتاح
ومع السلامة تستقيل
واستمتع بقي بالحياة
بعيد عن مصالح خلق الله
مع أطيب التمنيات
بالعمر الطويل
وعندك يا عم مليون بديل
..يعني مثلا
تتمشي ع الكورنيش
تتسلي ف طابور العيش
تتفرج علي أفلام قديمة ولذيذة
تزور حديقة حيوانات الجيزة
تشجع الزمالك
تشيل حديد
تلعب رياضة
تلعب بعيد
تهاجر عند خالتك ف كندا
تتفرج علي منظر الغروب
تصاحب أحمد المزين
تشرب خروب
تعمل ع الفيس بوك جروب
تتوب وتندم ع اللي فات
أو تنحرف وتعاكس البنات
لكن للأسف
في بلاد الهرم والنيل
مفيش استقالة
ولا حساب
ولا إحالة ولا تبديل
والكل عايش ف الوطن
يا صاحب ملك
يا إيجار قانون جديد
يا عابر سبيل

على سلامه شاعر العاميه المصريه

» وصفات لجمالك.. من بلاد الهند
» الفيل
» قصة اصحاب الفيل مصوره