حوار بين مسلم ومسيحى

حوار بين مسلم ومسيحى :
مسيحى : هو انتوا بتكرهونا ليه ؟؟؟
مسلم : مين اللى بيكرهكوا ؟؟
مسيحى : انتوا المسلمين
مسلم : ايه ؟؟؟ - ده مين اللى قالك على كده ؟؟؟؟
مسيحى : كل القنوات الفضائية والاحداث اللى بتحصل والكنايس اللى ولعت مش كل ده
دليل على انكم بتكرهونا ؟
مسلم : هههههههه ازاى يابنى بنكرهكوا واحنا واحد - وكمان انتوا اقرب ديانة لينا
المسلمين - طيب هسألك سؤال : انتوا بتعبدوا ايه ؟
مسيحى : بنعبد ايه ؟ - طبعا بنعبد الله وبنوحد ربنا
مسلم : طيب ما هو احنا برضه بنعبد الله يبقى ازاى بنكره بعض واحنا ربنا واحد
هو انت جنسيتك ايه ؟؟؟
مسيحى : مصرى طبعا
مسلم : وانا كمان مصرى يعنى نفس الوطن يبقى ازاى احنا الاتنين مصريين ونكره بعض
انت عارف الايمان هو ايه (ان تؤمن بالله وملائكته وكتبه ورسله واليوم الاخر والقدر
خيره وشره)
طيب احنا الاتنين مؤمنين بالله وموحدين زى ما قلنا
مسيحى : صح وكمان مؤمنين بالملائكة اللى فى السماء
مسلم : وكمان مؤمنين برسل الله نوح وابراهيم واسماعيل واسحاق ويعقوب وموسى وعيسى عليهم جميها السلام
بس احنا بنؤمن زياده عنكم بسيدنا محمد صلى الله عليه وسلم خاتم المرسلين
وكمان مؤمنين بكتب الله الانجيل والتوراه والقرآن
يعنى ربنا سبحانه وتعالى هو اللى نزل الاتنين يبقى ازاى فيهم خطأ اكيد مفيش فيهم خطأ واكيد بيدعوا لنفس التسامح والسلام
يعنى احنا تقريبا زيكم بالظبط يبقى ازاى احنا بنكره بعض
طيب هسألك سؤال : مش احنا جيران من زمان :
مسيحى : ايوه من اول ما اتولدنا وكمان آبائنا واجدادنا كانوا جيران من زمان
مسلم : طيب يبقى ازاى بنكره بعض
هو مش احنا كنا مع بعض فى المدرسه ؟؟
مسيحى : ايوه وفى الجامعة كنا مع بعض ولما اشتغلنا بقينا مع بعض كمان
مسلم : هو احنا لما كنا راكبين الاتوبيس امبارح مش لقينا واحده مسيحيه كبيره فى السن واقفه وواحد مسلم كبير فى السن وقمنا احنا الاتنين علشان هما يقعدوا يبقى ازاى احنا بنكره بعض ؟
مسيحى : ايوه فاكر وبصراحه احنا فى الحاجات اللى مع بعض كويسين وبنعمل الخير وعمرى ما انسى ان اوقات لما تبقوا عاملين حلويات كنافة فى رمضان بتجيبلونا منه
مسلم : ايوه ده لأننا واحد وانتوا كمان مش بتجيبوا لينا من اى اكل بناكله ولما اكون صايم فى رمضان انت مبتاكلش قدامى علشان مشاعرى
مسيحى : ايوه لأننا مع بعض طول عمرنا وكمان احنا بنتفرج على الماتشات سوا الاهلى والزمالك وبرشلونه وريال مدريد عندنا فى البيت علشان احنا عندنا الوصلة بنتفرج سوا كلنا والدى والدك وانا وانت او اوقات بننزل نتفرج على القهوه
الله يبقى ازاى احنا بنكره بعض صحيح ؟
مسلم : مش عارف طيب انت فاكر ايام الثوره ؟ فاكر لما كنا سهرانين طول اليوم قدام البيت تحت وفى ايدينا الشوم
مسيحى : ايوه صح فاكر ودى ايام تتنسى كنا سهرانين علشان نحمى اخواتى واخواتك ووالدتى ووالدتك وبيتنا احنا الاتنين
مسلم : يبقى ازاى احنا بنكره بعض ؟ وبعدين فاكر لما قلتلك انى بحب واحده وهروح اتجوزها مين اللى كان معايا وظبطلى كل حاجه من البدلة والبرفان الجميل مش انت ؟
مسيحى : ايوه وانت كمان عملت معايا كده لما كنت رايح اتقدم للوظيفه
بس انت مشفتش اللى حصل فى احداث امبابه ؟ المسلمين هما اللى ولعوها
مسلم : ازاى يابنى مسلم هيولع فى كنيسه ازاى - الرسول عليه الصلاة والسلام كان فى اى معركه كان بيأمر الصحابه انهم لايمسوا اى دار عباده سواء كان دير او كنيسه او غيرها ولو حد احتمى فيها يبقى تحموه
هو ده الاسلام - ولو حد عمل غير كده يبقى مش مسلم
وبعدين مين اللى قالك ان المسلمين هما اللى عملوها
مسيحى : السلفيين كانوا قاعدين هناك عاملين مظاهرة
مسلم : طيب ماهو احنا كمان كنا عند رامى صاحبنا المسيحى بنلعب بلاى ستايشن انا وانت ورامى ومصطفى ومايكل
ليه ماقالوش اننا اللى ولاعناها ما هو احنا كنا هناك
هو اى حد ماشى فى اى مكان فيه مصيبه يبقى هو اللى عملها
وبعدين مش فاكر الحراميه اللى كانوا عاوزين يسرقونا ايام الثوره واحنا كنا واقفين ليهم مش كان فيهم مسلم ومسيحى
مسيحى : ايوه فعلا بس دول بلطجيه مش ليهم علاقة بالاسلام ولا بالمسيحيه لأن مش كل واحد مكتوب فى بطاقته مسيحى يبقى مسيحى بجد ومش كل واحد مكتوب فى بطاقته مسلم يبقى مسلم بجد
مسلم : طيب انت صح يبقى قلى ازاى احنا بنكره بعض ، احنا طول عمرنا عايشين مع بعض وعمر ماكان بينا فرق
مسيحى : ولا احنا عمرنا ماقلنا مسلم ومسيحى على طول اخوات
مسلم : يبقى لازم ننادى انت وانا فى اخواتنا المتعصبين اللى العصبيه خلتهم ينسوا الحقيقه والواقع - واقع اننا واحد كنا ومازلنا وهنفضل طول عمرنا واحد
طيب ما كل واحد يفكر ان مش معنى ان واحد مسيحى عمل معايا حاجه مش كويسه يبقى كل المسيحيين غلط ووحشين
مسيحى : صح ومش معنى ان واحد مسلم يعمل معايا حاجه مش كويسه يبقى كل المسلمين وحشين
احنا طول عمرنا واحد ايد واحده فى بلد واحده وبنعبد اله واحد موحدين بالله واحنا جيران واصحاب وزمايل فى الدراسه والشغل
مسلم : معاك حق طول عمرنا وان شاء الله هنفضل واحد
مسيحى : امال مين اللى عاوز يخلينا نضرب بعض ونكره بعض
مسلم : دول اكيد ناس بيكرهونا احنا الاتنين وعاوزينا نموت بعض علشان الجو يخلا ليهم
وبعدين متنساش ان اكيد النظام السابق ليهم اتباع بره السجن عاوزين يولعوا الدنيا ويخليوها فوضى علشان يخرجوا
مسيحى : صح عندك حق انا لازم اقول لكل الناس وافهمهم اننا واحد ومفيش فرق بينا
مسلم : وانا كمان هعمل زيك بالظبط
مسلم ، مسيحى : قولولنا انتوا بقى ازاى بنكره بعض

» الإمام مسلم
» نصائح هامة لكل مسلم
» موسوعه ضخمه من المعلومات العامه حسب الاحرف الابجديه ( الالف)

حوار بين مسلم ومسيحى

حوار بين مسلم ومسيحى :: تعاليق

حوار بين مسلم ومسيحى

مواضيع مماثلة

مواضيع مماثلة