عاوزة دعائك يستجاب وبسرعة ان شاء الله تعالى اما اقلك

مين مننا مش عنده اى طلب ونفسه يتحقق مين مننا مش عنده مشكلة ونفسها تتحل مين نفسه ان حد يقربله وشايف ان دة مستحيل انا كنت زمان بقول ان دة صعب جدا لكن دلوقتى وبعد اللى طلبته واتحققلى بقيت مؤمنة اكتر من الاول كنت حسة زمان انى تايهةو مفيش اى حد معايا لكن دلوقتى انا اقوى من اى حاجة ليييييه؟

علشان حسيت ان ربنا معايا واتأكدت من قدرته وعظمته وانه ممكن يسخر اى حاجة ليكى طالما انتى ملتزمة بالشروط اللى حاططها للاستجابة


طيب انا ايه فايدة الدعاء بالنسبالى ؟


اقلك ياستى

مثال صغير جدا :انتى لما بتكونى عاوزة اى حاجة بتطلبيها من صاحب الحاجة نفسه

طيب دلوقتى احنا كلنا اكيد عارفين ان كل الكون كله لربنا جل جلاله وحده لا شريك له ربنا ملكه كل شيء الكائنات الحية والغير حية كلها ملك ربنا يبقى اطلب من مين غيره يبقى اذن احنا عرفنا ان اى حاجة احنا عاوزينها فى الدنيا دى نطلبها من ربنا ومنطلبهاش من اى حد تانى



طيب دلوقتى انا بحب اشتكى للناس عن مشاكلى واطلب منهم الحاجة ؟


هقلك دة اكبر غلط فى الدنيا ودة قلة ايمان بالله انك تروحى تشتكى وتعيطى للناس وتذللى كرامتك وانتى عندك اللى تقدرى تطلبى منه اى حاجة فى الدنيا دى مهما كانت مستحيلة وتقدرى تتكلمى معاه ان شالله حتى من غير صوت وهو سامعك واللى ممكن تعيطيله وتتذلى ليه وانتى بكامل كرامتك ومحدش يعرف اى حاجة واللى لازم تكونى واثقة ان محدش هيقدر يحققلك اللى انتى عاوزاه ولا يحللك اى مشكلة زيه حتى لو حد ساعدك هيكون بإرادته هو وبرضاه هيسخرلك حد يساعدك كله من عنده



طيب ليه الدعاء عبادة ؟


اقلك انا ياستى ربنا بيحطنا فى مشاكل وبيخلينا لينا مطالب مش علشان نبقى متدايقين ولا حاجة لأ كل الحياة بمشاكلها واحتياجاتنا ما هى الا اختبار طيب ايه هو الاختبار؟ الاختبار هو ان ربنا بيشوفك لما يحصللك مشكلة هتلجأى لمين هتروحى تشتكى للناس وتعيطيلهم ولا هتلجأى ليه هو لانك لو لجأتى لأى حد غيره فدة اعتراف منك انك اعوذ بالله شاكة فى قدرته على تحقيق الشيئ دة وانك شيفة ان مخلوق من مخلوقاته الضعفاء يقدر يساعدك اكتر فعشان كدة الدعاء عبادة لأن دة اعتراف منك ان ربنا قادر على كل شيئ ودى حاجة لازم نكون واثقين منها لأنه هو السبب فى وجودنا دلوقتى هو اللى مسخر لينا كل شيئ وهتزيدى ايمان بيه لما تطلبى حاجة وتتحقق يااااااااااه هتعرفى ان مفيش اكبر ولا ارحم من ربنا


طيب ماهو المشكلة ان ساعات كتير بدعى والدعاء مش بيستجاب فبيأس ؟؟؟؟



لااااااااا طالما قلتى يأس فخلينى معاكى شوية بقة

طالما جبتى سيرة اليأس يبقى فيه حاجتين

1- يا اما انتى يائسة من قدرة ربنا ورحمته (وما ييأس من رحمة الله الا القوم الكافرون ) يبقة انتى كدة اسفة انى اقلك انك مش مؤمنة وعشان تزودى ايمانك بصى لقدرة الله فى خلق السماوات والارض بصى لأيات الله فى الكون طيب بلاش ياستى بصى لنفسك شوفى عظمة خلقك

2- يا اما انتى يائسة لانك بتعملى حاجات غلط ومتأكدة ان ربنا مش راضى عنك وبالتالى فعلا مش هيستجيب ودة موضوع تانى هتكلم عليه تحت شوية


طيب ماهو الدعاء بياخد وقت طويل جدا عبال ميستجاب وانا ساعات ببقى عاوزة حاجة دلوقتى او عوزة المشكلة تتحل دلوقتى؟


انتى مين قلك كدة ؟؟؟؟؟؟؟؟؟؟الدعاء ممكن يستجاب فى ساعتها ماهى مش قضية هتتأجل او يتنظر فيها بس علشان الدعاء يستجاب بسرعة فيه شروط لو التزمتى بيها كلها هتلاقى معجزة وسحر والله



الحقينى بسرعة وقولى ايه هى الشروط اللى الدعاء بيها يستجاب وبسرعة



شروط استجابة الدعاء


ممكن الخصها فى جملة وحدة


(ربنا يرضى عنك )


صدقينى لو ربنا رضى عنك هتشوفى سحر ومعجزاته لو ربنا رضى عنك هيدهشك بعطاءه بس الكلمة ممكن تكون سهلة لكن الفعل والله سهل برده بس دة اللى بيتمتعوا فى عبادة ربنا مش واخدينا كأنه واجب عليهم


طيب بسرعة قوليلى ايه هى شروط استجابة الدعاء

اوك ياستى هقلك



1-الصلاة


اول حاجة الصلاة متفوتيش صلاة لو سمحتى طيب كويس انا بصللى ومش بفوت صلاة قولى حاجة تانى ؟استنى بس اقول ايه انتى بتصليها امتا ؟ انا بصليها فى اى وقت ..... بتصليها فى اى وقت ؟؟؟؟وعاوزة دعائك يستجاب بسرعة ؟؟؟؟طيب ازاى ؟ ازاى انتى بتأخرى صلاتك وازاى تشوفى الادان بيأذن وانتى بتعملى حاجة تانية ومتقدريش تسيبى اى حاجة فى ايدك عشان تصللى يبقى كدة انتى بتقولى ان اللى بعمله دة اهم من انى اقف بين ايدين ربنا واشكره واصليله يبقى بقة ازاى بتأخرى فى الصلاة وانتى عاوزة ربنا يستجيب بسرعة حاجة بالعقل كدة يبقى اهم من انك مش بتفوتى صلاة الاهم علشان ربنا يستجيب بسرعة ان شاء الله انك يكون عندك سرعة استجابة لفروضه وتصللى اول ما الادان يأذن كدة ان شاء الله هيكون ليكى الاولوية فى استجابة الدعاء اوك انتى عندك حق صح انا مش هفوت صلاة اوك دى اول حاجة لسة انتى مستعجلة ليه كدة ....... فيه ايه تانى ؟ طيب انتى بتصللى بتعملى حركات بجسمك وبقك وخلاص ولا بتكونى مركزة ف الكلام اللى بيتقال ؟ ساعات بسرح........ طيب حاولى متسرحيش حاولى تترجمى كل كلمة بتقوليها فى الصلاة بمخك علشان تكونى مركزة......ازاى يعنى؟ .......يعنى مثلا لما تيجى تقولى اياك نعبد واياك نستعين حاولى تترجمى معناها فى مخك يعنى قولى بنعبدك انت بس يارب وبنستعين بيك وحدك يعنى وهكذا علشان متسرحيش


2- قراءة القران


اقرى قران كل يوم حاولى متفوتيش يوم الا اما تقرى ان شالله حتة صغيرة ولو قدرتى طبعا تقرى كتير ثوابك هيكون اكبر وبرده مش تقرى وخلاص حاولى تتمتعى بالقراية حاولى تفهمى كل كلمة بتقريها حاولى تقريه كأنك بتقرى حاجة مشوقة مش تقرى بخوف يعنى اقرى بعينك او ببقك بس الاهم حاولى تتدبرى فى الكلمات والقصص الى فى القران هتلاقى نفسك ادمنتى القراية وانا بحب اوى اقرا قبل منام وانا حطاه عالموبايل علشان اقراه وانا نايمة واول مبقراه بنام براحة مشفتش بعدها وانا بحب اوى اقرا سورة يس و سورة البقرة وطبعا قبل مابقرا وبعد مابقرا بدعى الدعاء اللى انا عاوزاه بس اهممممم حاجة تقرى وتتدبرى فى اللى بتقريه مش قراية وخلاص لأن القران ربنا منزلهولنا عشان نفهمه وننفذه ونعمل بيه كأنه كتالوج الحياة لان مفيش فايدة من قرايته كدة وخلاص


3- صلاة الاستخارة

صلاة الاستخارة دى سحر بمعنى الكلمة اى حاجة عندك مهما كانت صغيرة استخيرى فيها ربنا وكرريها ومتيأسيش انا يوم مادعائى استجاب كنت لسة قايمة من صلاة الاستخارة مفيش دقيقة والله


4- الصدقات

ودى مهمة اوى ومش لازم فلوس كتيرة ولا كمان فلوس قليلة اى حاجة فى ايدك اى حاجة تقدرى عليها يعنى مثلا مش يبقى معاكى فلوس مش هتعملى بيها حاجة مفيدة وتقولى مش لازم فلوس كتيرة لا طالما مقتدرة يبقى ساعدى الناس يعنى مثلا لو انتى عاوزة تشترى حاجة شيكولاتاية مثلا طبعا انتى بتاكلى ومش مفيدة ليكى اوى الحاجة دى واشتريتيها وانتى ماشسة شفتى راجل عجوز او طفل صغير واديتيهاله شوفى بقة انتى هتحسى بأيه لما تشوفيه فرحته فى عينه وبيدعيلك والله هتعيطى من الفرحة هتبقى فرحتك احسن متكونى كلتيها لأنك تقدرى تجيبى كتير منها لكن هو ميقدرش يجيب اى حاجة زى كدة وممكن مش يكون كلها قبل كدة طول عمره اصلا مثلا روحتى ووصلتى للشارع بتاعك وكان باقى معاكى اكل وبقيت الفلوس بتاعة المواصلات ومش هتستفادى منهم بحاجة ولقيتى واحد عجوز تعبان طولاليوم بيكنس علشان يجيب لأولاده حاجة صغيرة يفرحهم بيها اديهومله هتفرحى جددددددددا لما تشوفى فرحته فى عينه وبعد متديهومله ادعى ربنا باللى انتى عاوزاه


5- كلمى ربنا كأنك شيفاه

كلمى ربنا كأنك شيفاه بالليل قبل متنامى لو عندك مشكلة احكيهاله بدل مابتحكى للناس وعيطيله واتزلليله لان زلك ليه دة مش قلة كرامة اعوذ بالله لأ دة عبادة ويقين منك انه موجود واعتراف انك مؤمنة بيه احكيله على كل حاجة وكلميه من غير خوف دة ربنا رحيم جدا ورؤوف ربنا الوحيد اللى قادر يفهم قصدك وطلبك من غير حتى متطلعى صوت مش زى الناس لما تشتكيلهم يفهموكى غلط ودة غير انه الوحيد اللى فى ايده يساعدك متخافيش من اى حاجة بتقوليها لربنا وكلميه بكل بساطة دة ربنا اقرب لينا من حبل الوريد زى ماقال سبحانه فى القران اطلبى منه اى حاجة انتى شيفاها مستحيلة مع ان مفيش حاجة مستحيلة طالما بتدعى


6- اتركى الحرام

اى حاجة حرام فى الدنيا سيبيها خوفا من غضبه ومتخافيش انك كنتى بتعملى حرام اى كان هو ايه لأن كدة انتى احسن عنده من اى حد لانك سبتى الحرام لرضاه وكل ابن ادم خطاء وخير الخطائين التوابين وصدقينى لو انتى خيفة من غضب ربنا هتخافى حتى تتخيلى الحرام فى دماغك سيبى اى حاجة حرام فى الدنيا ربنا ان شاء الله هيديهالك فى الحلال اهم حاجة تخافى من غضبه وتعملى على رضاه



7-متيأسيييييييش

اوووووووعى تيأسى فى الدعاء وانتى بتدعى ربنا هيعملك شوية اختبارات كدة هيشوفك بتيأسى من رحمته ولا لأ وشكة فى قدرته لا سمح الله ولا لأ يعنى اقلكم انا مثال بس علشان تعرفوا انا لما كنت بدعى ان الانسان اللى بحبه يقرب منى قعدت ادعى كتير اوى وكل يوم وكل لحظة ومهما كان بيحصل كنت بدعى يعنى وصلت لدرجة ان بفتح صورة ليه شفت مع اصحابه وفيه دبلة فى ايده وبرده ميأستش ودعيت وعيطت لربنا وكلمته عارفين الانسان دة قللى ايه لما كلمنى ؟؟قللى بصى كويس والله انا شاكك فى نظرك دى ايد صحبى والله والله والله انا لما دققت فيها ساعتها لقيتها فعلا ايه صاحبه مش ايده وقعدت اضحك ساعتها واشكر ربنا وعرفت ان ربنا كان موريهالى كدة لانه كان بيختبرنى وبشوفنى هبطل ادعى وايأس ولا لأ


8-الاستغفار

استغفرى ربنا كتير اوى واقلك حاجة مسلية وحلوة تعمليها اتخيلى وافتكرى اى موقف غلط كنتى بتعمليه وهاتيه فى بالك كدة كأنك مشغلة شريط واستغفرى ربنا على كل موقف من المواقف دى هتلاقى نفسك بتستغفرى كتير جدا بس اهم حاجة مش تستغفرى ربنا وترجعى تعملى الغلط كدة يبقى انتى ضيعتى اى حاجة اتكلمنا عليها

9-صلى عالنبى


الصلاة على النبى قبل وبعد الدعاء اللى انتى عاوزاه بجد بيحققه


10- حاولى تساعدى الناس وتخليكى كويسة معاهم كلهم علشان تبقى بترضى ربنا وطبعا ارضى والدك ووالدتك بجد حاجة حلوة اوى


11- وفى الاخر بقة كل اللى الناس هيقدروا يساعدوكى بيه هو انك تخللى اكبر عدد من الناس يدعولك مش تشتكيلهم لا تخليهم يدعولك ربنا اللى فى ايده كل حاجة وله ملك السماوات والاخر ومابينهما وادعيلهم انتى كمان

ودة هدية منى ليكم دعاء بيفتح باب السماء علشان دعوتك توصل بسرعة باذن الله

قولى (الله اكبر كبيرا والحمد لله كثيرا وسبحان الله بكرة واصيلا وبعدين قولى اللهم صللى وسلم وبارك على سيدنا محمد اشرف النبيين والخلق وادعى باللى انتى عاوزاه وبعدين صلى عالنبى تانى )

عارفين انا زمان كنت بعيط لأن مش مؤمنة وبعمل حاجات كتيرة غلط ولما كنت بدعى كنت بعيط لربنا عشان يستجيب ودلوقتى بعيط من فرحتى على استجابة الدعاء عيطى بس فى حاجة مفيدة ومتعيطيش من اليأس ابدا طالما معاكى ربنا القادر على كل شيئ بس متنسيش اهم حاجة رضااااااااااااااه ارضيه هيدهشك بعطاؤه

اختى المنكسره للرحمن بجد موضوعك رائع

جزاكى الله خيرا

مشكوره