أنا يا اتخطب يا هروح اصاحب

بصو بقا ما انا يا اتخطب يا هروح اصاحب و محدش يقولي عملتي كدا ليه
دي كلمة ممكن تكون جت في بال كل واحدة مننا و ممكن تكون اتجرأت و قالتها و بالفليل كان الرد عليها قلم ع وشها او "شوف قلة الحيا"
اكيد كلمة زي دي عمر اهالينا ما هيفهموها لان اهلنا لسة عايشين في زمن اللي فيه البنت لو صاحبت اخوها هيرنها علقة تحلف بيها رغم انه ممكن يكون مقضيها بيس يعني
انما في زمنا دا و اللي غايب عن اهالينا ان ممكن البنت عادي تصاحب و تنزل صورها مع المحروس البوي فرند ع الفيس بوك و كمان تعمل لاخوها تاج و عادي جدا بردو النطع اخوها يرد عليها " nice pic .. salmy 3leh y koky "

لما دخلت الجامعة و بعد ما تعقمت فيها و شوفت المناظر المريبة جالي احساس بالقرف و اني عاوزة افومت ( تعبير جاي من كلمة vomiting يعني ارجع ) كمية من قلة الحياء و المناظر المستفزة بشكل مريب ..

فكرت في الجملة اللي فوق و لقيت انها منطقية جدا ما اصل الصحوبية دي نتاج مشاعر ربنا خلقها جوانا و جعل من الفطرة انجذاب الذكر للانثى و العكس . لكن زي ما ربنا خلق لنا المشاعر اوجد القواعد اللي تحجمنا و تقنن الحياة حوالينا
في ناس التزمت بقواعد الرحمن و ناس تانية عملت زي اللي رمى الكتالوج و قال هشغل الجهاز لوحدي و قالوا ع القواعد دي تخلف و رجعية و عشان يسكتوا ضميرهم قالوا دول بس زمايل دول زي اخواتي و احنا مش بنفكر في حاجة من الحب و كدا او طلعوا الانتمة و الصحوبية و الجو دا

بحلقت في السقف و عجبني كل اللي جه في بالي دا و قلت ارهق نفسي شوية كمان و اشوف ليه المصاحبين بيتصرفوا كدا و ازاي اللي محافظين ع نفسهم عاملين كدا

الناس بتاعة القواعد دي رجعية و بتاع دول وش عندهم نقص يا اما نقص في ثقتهم و ماشيين بمبدأ " انا حلوة اهوه انا حواليا كتير اهوه " يأما عندهم نقص في العاطفة مع اهاليهم يعني بالعربي كدا اهلهم مش مهتمين بهم فهما بدوروا ع الصدر الحونين برا البيت

اما الناس اللي ملتزمة بقوانين الله و محافظين ع نفسهم فانا بحيي بس اللي بيعملوا كدا عن اقتناع عشان ربنا عشان نفسهم ضحكتهم حقيقية و حياتهم حقيقة و لا الف ولد يقدر يهزهم اما اللي بيعملوا كدا عشان الناس فدول بيتعذبوا اوي و بيتخنقوا اوي و بيقعوا كتير اوي اوي وفي الاخر مش بيرضوا عن حياتهم و بيكرهو العيشة و بيبقوا لا طالوا بلح الشام ولا عنب اليمن

و تكلمة للارهاق بقا قلت اتعب نفسي شوية كمان و افكر اكتر في المثل ""اللي بيقول الزن ع الودان امر من السحر"" و لقيت ان الولد بيمتلك قدرة زنية رهيبة بيستخدمها ضد البنت لحد اما تقع و هي هي نفس القدرة اللي بتستخدمها البنت الضايعة اللي ماشية بمبدأ "" اهو كلنا كدا "" عشان توقع صاحبتها الغلبانة اللي كل غلطها انها صاحبتها من غير تدقيق طيب دلوقتي بقا ليه الزن بيجيب نتيجة ؟ تقريبا كدا دا بسبب دافع الفضول اللي مزروع جوانا اللي بيخلينا نشوف النار بتحرق ولا لأ ز يخلينا نشوف لو صاحبنا هتحصل كارثة ولا مصيبة ( ع اساس ان في فرق يعني )

طيب بعد كل الرغي دا واللي تقريبا انتم عارفينه بس انا قلت مش معقول ارهق نفسي و افكر و مش ارهقكم معايا و تقروه فقلت اكملها و اشوف الحلول هي المشكلة كلها عندنا اننا بنكون عاوزين نشغل وقتنا نلاقي حد نهزر و نضحك معاه و وقت الجد نبكي و نشكيله و دا ممكن يتحل بحاجات كتير
... اولا الصحبة و اكيد مش في يوم و ليلة هنغير كل صحابنا و قولهم مش هنكلمكم انتم كخة و وحشين لكن الفكرة اني اشوف بنت ملتزمة واحدة بس اقرب منها و اكلمها كتير عشان تبهت عليا و شوية هلاقي اللي زيها كتير و بعد شوية صحابي اصلا الوحشين هيسبوني بحكم اني بقيت معقدة و رجعية متخلفة من الجاهلية و كدا
.... ثانيا وقت الفراغ يتملي باي حاجة و كل حاجة يعني عايزين ترسموا تشخبطوا تكتبوا تقطعوا الورق تنضفوا البيتتلعبوا رياضة تشتغلوا اي شغلانة و السلام
و الحل السحري معايا انا و بس و من غير لا دجل و لا شعوذة هو "" العمل التطوعي "" ربنا قال "" و من تطوع خيرا فهو خيرا له "" بجد من احسن الحلول اللي ممكن تقضي ع وقت الفراغ و تشغل البنات و تكسبهم مهارات و خبرات رائعة و اهم حاجة هتعرفوا معنى العبادة و معنى الحمد بجد

اخر حاجة بقا و اروح خلاص عندي سؤال واحد -- ليه تربطي حياتك بواحد عيل مامته بتناديه يا معفن قوم زاكر و يا منيل روح هات الاكل ( سوري في الالفاظ لكن دي حقيقة ) هو فعلا بياخد مصروف من الماما بتاعة الهو و مش راجل و يدوب بيشم نفسه برا قشرة البيضة و بعدين ايه الحلو في اراجوز بينط من الشباك و ميعرفش طريق الباب
( يعني داخل غلط و بيلعب )

يا بنات خلي شعاركم "" لست هنا لكن عطري مازال "" لما تموتوا خلوا الناس تحكي بانجازتكم و اخلاقكم و مجهودكم بلاش تكون كل حياتنا عشان الجوازو الحب ما يمكن بنات مش تتجوز لا قدر الله هنعمل ايه يعني نموت من الاكتئاب و حياتنا تضيع

اسفة ع الرغي الكتير لكن دي فضفضة من القلب لكم ربنا يعينا و يعنكم ع الثبات و الهداية

دمتم بود و جزيتم الجن

أنا يا اتخطب يا هروح اصاحب Eng1vq2

شكراااا ع الموضووع

شكرا على مرورك

تحياتي