هدف ثم وصول فاستقرار

تقريباً مافي شخص الا وفكر كيف يحقق طموحاته .. من اي ناحية يمرّ فيها او يتمنى يوصل لها ..
سواء انه يكسب في عمل .. او يبني لمشروع .. او ينحح بدرجات ممتازة .. او يستقر اجتماعياً .. وغيره من امور حياتيه ..

الوصول دائماً يحتاج خطوات .. مافي شخص وصل بالصدفه .. ومافي شخص وصل بمساعدة الا وهو مايستمر كثير في مكانه ..
بعد الله والمكتوب له .. الشخص كثير يحدد وهو يختار وهو يفكر وهو يعمل ..

نجاح ماعمله .. من نجاحه .. وفشل ماعمله .. من فشله ..
ممكن اشياء يتجاهلها .. ويعتبرها مو مهمه .. ويعتبر " فلها وربك يحلها " شيء يخليه يعيش حياته ويفقد نفسه ..

انه يبني هدف .. وانه يوصل لهدفه .. وانه يستقر عليه وصوله ..
يحتاج نقاط .. فما في خطوات يخطيها بدون علمه .. فآكيد مافي خطوات يخطيها الا وفيه ترتيب لها ..

يحتاج بالاول .. انه يخطط .. لآبد يعرف من وين يبدأ .. واذا استمر وش التالي .. واذا فقد طريقه .. او ماوصل .. وش الخطوة الثانيه ..
شخص يحلم من الابتدائي والمتوسط .. ويبدأ يركز علشان يوصل الهدف اللي يتمناه .. ويوصل اي خطوة في المجال .. ثم يبدأ مره ثانيه يفكر بعد التخرج وش مكاني ..

اذا شفنا ابرز اطراف .. بنلقاهم اشخاص مخططين .. مثل من يصير معيد .. مثل من يجيب نسبه تخليه يبتعث .. مثل من يجيب نسبه تخليه يكمل الماجستير ..
اي احد غير هالاطراف .. غالباً طريقه بالنهايه مجهول .. ممكن مايجيب نسبه .. وممكن يلقى وظيفه وممكن لا .. اذا لقى وظيفه ممكن تعجبه .. وممكن لا ..

لا ترضى بشيء اذا ماعرفت تخطيطك وش بيثمر فيه .. لا تدخل مشروع ولا تدخل قسم ولا تدخل مجال وانت ماتدري وش مستقبلك .. حتى لو تنتظر سنه وسنتين .. آختر الشيء اللي تعرف نتيجته ..
لان المجهول يلغي الهدف .. انت ماخططت .. انت ماتعرف وين توقف .. انت ماتعرف وش النقطه اللي بتوصلها .. فآكيد انت بتوصل شيء اما مايرضيك او بتفقد طريقك وتروح لاكثر من مسار ..

يحتاج بالثاني .. انه يبتعد عن اي طريق فيه غش .. وفيه سرقه ..
ممكن تعطيه شيء .. لكن بتأخذ منه اشياء .. انه رضى فيها .. ممكن يعتمد عليها .. ممكن يستمر فيها طالما قد عملها ..

باكثر من نقطه نعرف قيمة هذا الشيء .. ممكن في آمور مانحس فيها .. لكن نلقى من تأثيرها ..
اشخاص بدوّ من الصفر وصلوا اعلى مكان لانهم تجنبوا استخدام الخطأ .. والعكس اشخاص اعتمدوا عليها وماقدمت لهم ..

الشيء الثالث .. انك ماتتوانى تستفيد من تجارب اللي قبل .. انجاز او اخفاق ..
مو ان تستسهل الشيء او تستصعب الشيء .. لكن انه يعلمك كيف تتعلم وكيف تتعامل ..

مثلاً آحد دخل مشروع ووثقّه قبل مايجيب موظفين .. مشروعه ترسّم .. في وقت انه ماقدر يخليه واقع ..
انت تأخذ كيف خطى .. وش فشل فيه .. وش نجح فيه .. واستثمرها ..

رابع شيء .. انك ماتنظر للي آقل منك .. لا تفشل بمشروعك وتقول تسعين بالميه دخلوه وفشلوا .. ولا ترسب بالدراسة وتقول كثير من المقرر رسبوا معي ..
في وقت انك تعذر .. العشره بالميه اللي نجح مشروعهم .. والبقيه اللي نجحوا بالمقرر .. هم سبقوك بخطوات يمكن ماتحس فيها ..

غير انك في اي طريق بتلقى الافضل والاسوء .. انك ترضى بالثاني على حساب الاول فانت احتمال كبير بتنضم لهم .. وتعتبر هالشيء مو بيدك ..
اما انك ترضى بالاول .. فانت ان دخلت .. فتبقى تتنافس وتتميز .. وممكن حتى لو فشلت مره او مرتين او ثلاث .. تفكر كيف تستمر مثل ما استمروا ..

الشيء الخامس والآخير .. انك تستقر على الشيء اللي وصلته .. وتحاول تدعمه اكثر ..
مثل انك تأخذ رأس المال .. وتشتغل عالارباح هالنقطه هي المقصوده .. فانك تبقى على نجاحك وتحاول تنجح اكثر ..

تتوسع في مشروعك .. تأخذ شهادات .. تأخذ خبرة في مجالك .. تشارك في نشاطات .. دورات .. كلها اشياء مطلوبه ..
فانت انك تتوقف على وظيفه .. او تتوقف على محل مثلاً .. بتبقى في المكان اللي وقفت فيه .. وهنا بنشوف الفشل بصوره ثانيه .. فالفشل يأخرك لانه يعطلك .. وهذا يعطلك لكن باختيارك ..

اني اقول استقرار .. مايعني تمشي على نفس الخط .. لكن في اشخاص .. غامروا وخسروا لانهم تسرعوا وماتركوا نقطه ثابته ..
انه لو فشل ماراح يفقد كثير .. واذا نجح فهو بيرتقي بمكانه .. يعني مو يستقيل من وظيفه وهو مايدري قبوله في الوظيفه الثانيه ..

وفيه نقطة اساسيه ماحبيت اضيفها من الخطوات حتى لا احصرها .. لانها مهمه في اي شأن يخص الواحد ..
انه يتوكل بنيه طيبه .. ويرضي ربه .. ثم يرضي والديه واهله .. وانه مايغلط او يظلم احد بطريقه ..

يمكن كلامي يعرفه الكثير .. ويتداول كثير .. لكن طرحته لاني بعدي اشوف اشخاص مالهم هدف ..
اشخاص بتخلص الجامعه في اسرع وقت .. واشخاص تعتبر النجاح عالحافه شيء حلو .. واشخاص مستواها نفسه نفسه ..

حاولت اتركه مبسط .. ومتأكد ان نقص منها شيء او زاد فيها شيء .. مو قيمته هنا ..
كل واحد واللي آخذه من قيمه باللي يشوفه ..

» وصول كاديلاك SRX المحسنة للعام 2012