سواق التاكسى والماتش

كان اليوم دة فيه ماتش مهم وبما إنى معلوماتى عن الكورة معدومة.
كل الى ممكن أقوله إن الماتش مهم..

يوم من الأيام اللى الشوارع بتبقى فيها فاضية وجميلة والناس بتأجل أى مواعيد لبعد الماتش

بتهيئلي انتم كده اتخيلتوا أهميه الماتش ده

المهم عم حسن كان مضطر ينزل الشغل (طبعا عم حسن أكيد سواق التاكسى)
وطبعا كان على عينه إنه مش هيشوف الماتش ولكنه لازم ينزل علشان أكل العيش بقى!!

طول ماهو ماشى فى الطريق يقف ويسأل زمايله فى التاكسيات والميكروباصات

(ها أخبار الماتش أيه؟؟ )

يطمن ويكمل سواقة وكل ما يركب معاه زبون يفضل يتكلم معاه عن الى هيكسب وعن الحكم وعن البلينتى الأخير و....و ...... و ........

وبعدين
يوقف يسأل عن النتيجة وطبعا معروف مدى الفرحة لو جه جون ومدى التعاسة لو
جه جون مضاد ومتابع كويس ولا كأنه كان بيتفرج على الماتش

قصه عم حسن قصة عادية جدا وبنشوفها مع كل عم حسن وعم إبراهيم و........و.......

*********************************

لكن فيه سؤال يبدو مضحك بيطرح نفسه

:أين كان عم حسن أثناء المبارة؟؟؟

هل كان في الاستاد ولا كان في التاكسي ؟

لو جينا للدقة

هو كان موجود ببدنه فى التاكسى وبقلبه فى الأستاد

إنتهت القصة ويبقى المعنى

........................................................................

السؤال الأهم

طب يا ترى أحنا فين؟؟ وقلوبنا فين؟؟؟

يا ترى أنت قلبك فى الدنيا غرقان فى متاهاتها حتى وقت الصلاة

بدنك واقف أمام الله وقلبك فى الشغل أو فى مشكلة لدرجة إنك بتخلص مش عارف أنت صليت بأيه .

.وحتى لو دخلت المسجد كل كلامك عن الدنيا.وعن الشغل وعن المشاكل وعن وعن و ........ و ...........

ياترى أحنا فعلا كل همنا الدنيا

بنحزن لها ونفرح لها ونخطط لها وحتى وقت الاخرة فى الصلاة وفى المسجد برضة معاها

ياترى أحلامنا الى بتعبر عن عقلنا الباطن بنشوف فيها إيه؟؟

ياترى طموحاتنا وكلامنا أغلبه عن إيه؟؟؟

ياترى لو كل واحد سأل نفسه دلوقتى حالا قلبى فين؟؟؟

هتكون الأجابه ايه؟؟

وما أبرأ نفسى ان النفس لاماره بالسوء الا ما رحم ربى

ولا يا ترى أنت زى السبعة الذين يظلهم الله بظله يوم لا ظل إلا ظله

(ورجل قلبه معلق بالمساجد)

ياترى أنت بتشتغل فى الدنيا وبتدرس وبتروح وتيجى فيها ببدنك لكن قلبك مع ربك

ماشى فى حياتك عادى زيك زي غيرك بس ببدنك

ولكن قلبك مشغول بحاجه أسمى عمال تكلم الناس عن ربنا وعن الجنه وعن رحمته وعن قرانه وعن.حبه وعن رسوله...........

أفراحك فى كثير منها متعلق بالدين وأحزانك عشان تقصيرك فى حق ربك.

ولا ياترى أحنا فشلنا نكون أحنا والدين زى عم حسن والكورة

جزاكم الله اخوانى واخواتي فى الله كل خير

» أنا سواق القطار يا أولاد....-أبو خالد