"أضعف خلقه " .. بقلم الكاتبة /عواطف حافظ

"أضعف خلقه " .. بقلم
الكاتبة /عواطف حافظ

كان يا ماكان ؛ يا سادة يا كرام ؛ ولا يكون الكلام ؛ قبل ذكر
النبى عليه الصلاة والسلام ..

كان فيه زمان زمان فى دنيا الحواديت حمار ودودة وكلب صيد ؛
الحمار كان غلبان غلبان وطول الوقت شغَال وعلى طول تعبان ؛ يصحى الصُبح يروح الغيط
شايل على ضهره أحمال ؛ وبعد الضهر ف عز الحر يرجع شايل حِمل جبال .

والكلب كمان مهدود ؛ كان بيروح مع صاحبه بعيد ؛ أصل صاحبه غاوى
سفارى ؛ وعنده هواية الصيد ؛ مرة يروح صحرا ؛ ومرة يروح غابة ؛ ويخوف مرة تعالب ؛ ومرة يجرى ورا ديابة .. كل اللى عايزة اقوله
ان الحمار وكلب الصيد كانوا غلابة ؛ على طول شغالين ولا عمرهم اشتكوا ولا مرة
قالوا حاجة .

وف يوم من الأيام
الحمار والكلب اتقابلوا ؛ ورغم ان الحمار معروف عنه الصبر إلا إنه قعد
يفضفض للكلب ؛ ويقوله إن حياته كلها غُلب ف غُلب ؛ لكن وهو بيحكى لقى ورقة شجر
جنبه بتتحرك ؛ بصلها واستغرب ؛ راح الكلب بسرعة هبشها ؛ لقوا تحتيها دودة قاعدة تاكل ولا على بالها
..

الحمار بصلها بغل وحسرة وقالها .. انتى قاعدة مرتاحة ومستنية
لما الهوا يحدف لك أكلك لحد رجليكى ؟؟ واحنا طلعان عنينا ويا ريت فى حد بيشكرنا او
حتى يحس بينا !!

الدودة بصتلهم باستغراب وقالتلهم .. مساكين دماغكوا على قدكوا
.. مساكين وانتوا شايفين ان مفيش حد تعبان قدكوا .. كل مخلوقات ربنا تعبانة ؛ ده احنا اتخلقنا عشان نشتغل .

الكلب رد وقالها .. وانتى ياحلوة يا صغرة شقيانة ف إيه ؛ ايه
اللى تاعبك .. قولي لنا يا اختى ايه !!

الدودة ردت عليه وقالتله .. هاعمل انى مش واخدة بالى من تريقتك
.. بس انا ساكنة الأرض دى من ساعة ما اتخلقت .. انا اللى مسئولة عن تهويتها ؛ من
غيرى مفيش محاصيل هتعيش ؛ انا اللى بهوى الأرض ؛ وبافتح ممرات علشان تصريف المية
الزيادة من التربة ؛ وانا باتغذى على ورق الشجر اللى واقع على الأرض وارجع اخرجة
تانى فى صورة مواد غذائية غنية تستفيد بيها التربة وبكدة ما تحتاجش لا لأسمدة ولا
كيماويات وعلى رأى المثل " يوضع سره فى أضعف خلقة " .

دائما متميز في الانتقاء

ودائماً ما تضيفين بهاءاً أينما حللتى
دمتى جالبةً للسعادة والبهاء

الرائعة ميمو ..
كان الثناء على الإدارة فأصابنى بفيضه
اشكر لك رقتك

عواطف

» أهلا ومرحبا ب عواطف حافظ الشاعرة الرائعة
» قبل الكل بهني بعيد ميلاد شاعرتنا الرقيقة' عواطف حافظ' كل سنة وانتي طيبة
» القطط عجيبة الله فى خلقه